ശരികള്‍ മാത്രം തേടുന്നവര്‍ക്ക്

ഒറ്റയ്ക്കിരിക്കുമ്പോഴാണ്
തിരിച്ചറിവുകളും വെളിപാടുകളും
ഉണ്ടാവുന്നത്.
കൂട്ടുണ്ടാവുമ്പോള്‍
തിരിച്ചറിവുകളും വെളിപാടുകളും 
തെറ്റായിരുന്നു എന്ന ബോധ്യവും.

തെറ്റുകള്‍ ഉണ്ടാവേണ്ടത്
കൂടുതല്‍ വലിയ ശരികളുടെ
പിറവിക്ക് അനിവാര്യമാണ്
എന്നതുകൊണ്ട്‌,
നാളെ തെറ്റാണെന്ന് ബോധ്യം ഉണ്ടാകുവാന്‍,
കൂടുതല്‍ തിരിച്ചറിവുകളും വെളിപാടുകളും
ഇന്നിനിയും ഉണ്ടാവട്ടെ.
കൂട്ടുണ്ടാവുമ്പോഴും,
തെറ്റുകള്‍ മരണപ്പെടാതിരിക്കാന്‍,
മനസ്സിലൊരു കോണില്‍
ഞാനിനിയും ഒറ്റയ്ക്കിരിക്കട്ടെ.

ശരികള്‍ മാത്രം തേടുന്നവരെ നോക്കി
ഞാനിനിയൊന്ന് പുഞ്ചിരിക്കട്ടെ.
പുച്ഛം വിതറട്ടെ.

കവിത

അനേകം കഥപറച്ചിലുകളുടെ ഇടയിലേയ്ക്ക്
വലിഞ്ഞുകയറിവന്ന
കവിതയായിരുന്നു
അന്ന് പ്രണയം.

ഇന്ന്,
കഥകളിലെല്ലാം
കവിത ഒളിഞ്ഞിരിക്കുകയാണ്.
മഞ്ഞ ചുവപ്പില്‍ എന്നതുപോലെ.